لا تحاول تقليد الاغنياء عيش حرا ماليا

إنّ محاولة تقليد الأغنياء هو ما يزيد الفقراء

 فقرا
-
ببساطة
لكي لا تسقط في فخّ الفقر
القاعدة هي
((( اجعل مستواك الاجتماعي اقل من مستواك المالي )))
-
يعني ايه
-
يعني لو فلوسك تركّبك عربية مرسيدس
اركب باسات
-
لو فلوسك تركبك باسات
اركب تويوتا
-
لو فلوسك تركبك تويوتا
اركب فيرنا
-
لو فلوسك تركبك فيرنا
اركب تاكسي
-
لو فلوسك تركبك تاكسي
اركب مواصلات
-
لو فلوسك تركبك مواصلات
امشي
-
فيه حاجة اسمها الحرية المالية
ودي غير الغني
-
الحريّة الماليّة تعني الاستغناء
لكن الغني يعني يكون معاك فلوس كتير
وبناءا عليه
فمعظم الاغنياء ليسوا احرارا ماليا
لأنّهم لا يستطيعون الاستغناء عن العمل
-
الحرية المالية هي ان يكون معك مدخرات
تسمح لك بان تعمل او لا تعمل - حسب مزاجك
فحين تعمل وقتها تكون تعمل لمجرد حب العمل
-
تخيل واحد بيكسب في الشهر مليون جنيه
ايه رايك ؟!
هل ده حقق الحرية المالية ؟
-
مبدئيا هو حقق الغني
-
لكن نقطة الحرية المالية دي محتاجة سؤال تاني
الا وهو
الشخص ده بيصرف كام في الشهر
-
لو كان بيصرف مليون جنيه
يبقي غني ايوه
لكنه ليس حر ماليا
-
لانه لو خد اسبوع اجازة من الشغل
هيبقي بيكسب 750 الف جنيه
بينما هوا بيصرف مليون
يبقي هيستلف 250 الف
-
عشان كده ما تستغربش
لما تلاقي واحد كسب مليون جنيه في مسابقة مثلا
وبعد سنة تلاقيه بيشحت
عادي جدا
-
الفكرة ليست في كم تتحصل عليه من مال
ولكن في كم يمكنك الادخار منه
-
وما تستغربش بردو
لو لقيت واحد بيكسب مليون جنيه في الشهر
وبيشتكي من ضيق المعيشة
-
أيوه
ما هو بيصرفهم كلّهم
فبيضطرّ ينزل يتسحل في الشغل تاني
-
هذه المصيدة الناتجة عن شراهة الاستهلاك
والتي لا تدع لك فرصة للإدّخار
بسبب زيادة النفقات مقابل زيادة الدخل
يعني كلّ ما تكسب أكتر تصرف أكتر
فتفضل محلّك سر
-
واحد كان بيكسب الف ويصرف الف
بقي بيكسب 10 الاف ويصرف 10 الاف
بقي بيكسب مليون ويصرف مليون
-
كل واحد من دول عبد للمال
لم يصل بعد للحرية المالية
-
وشبكة العنكبوت المالية قوية جدا ومخادعة جدا
يمكنها السيطرة علي كائن من كان رغم ذكائه
-
ولذلك اضع بين يديك هذه القاعدة البسيطة
((( اجعل مستواك الاجتماعي أقلّ من مستواك المالي )))
-
لما انتا موظف غلبان - شايل موبايل تاتش ليه ؟
لما انتا موظف متوسط - شايل ايفون ليه ؟
لما انتا معاك موبايل سامسونج - بتشتري الجديد ليه ؟
-
هذه مصيدة الوضع الاجتماعي
التي تجعلنا دائما ندور داخل دوامة العمل
-
اذن
هل تقصد ان نكون بخلاء
-
بالطبع لا
البخيل لا ينفق اساسا - بغض النظر عن الدخل
ولكن العاقل هو من ينفق بقدر اقل من دخله
فيحدث عنده ادخار
-
فيه حديث اسمه حديث السحابة
بيقول
بينما رجل يمشي بفلاة من الأرض
فسمع صوتاً في سحابة
اسقِ حديقة فلان
-
فتنحى ذلك السحابُ فأفرغ ماءه في حَرّة
فإذا شَرْجة من تلك الشراج قد استوعبت ذلك الماء كله
-
فتتبع الماء فإذا رجل قائم في حديقته يحوّل الماء بمِسحاته
فقال له: يا عبد الله، ما اسمك؟
قال: فلان
بالاسم الذي سمع في السحابة
-
فقال له: يا عبد الله، لمَ تسألني عن اسمي؟
فقال: إني سمعت صوتاً في السحاب الذي هذا ماؤه يقول
اسقِ حديقة فلان لاسمك
فما تصنع فيها؟
-
فقال: أمَا إذ قلتَ هذا فإني أنظر إلى ما يخرج منها
فأتصدق بثلثه
وآكل أنا وعيالي ثلثاً
وأرد فيها ثلثه
-
الشرح إنّ حد كان ماشي في مكان قاحل
وبعدين لقي سحابة جات فوق حديقة شخص ما
وامطرت عليها فقط
-
فالراجل راح لصاحب الحديقة دي وساله
انتا بتعمل ايه
قال له ولا حاجة
الوضوع ببساطة
ان اللي بيجيلي من الحديقة بقسمه ثلاثة اقسام
ثلث اتصدق به
وثلث انفقه علي اهلي
وثلث ارده في الحديقة - وده اسمه ارباح استثمارية
يعني بياخد من الربح ويدخله في راس المال تاني فيكبر
-
فحضرتك المفروض تصرف ثلث ما تربحه فقط
-
هتقول لي طب ما كده عمري ما هشتري المرسيدس
-
لا بردو
اشتري المرسيدس لما يكون تمنها اقل من مستواك المالي
لما يكون مستواك المالي يخليك تشتري رولز رويس
ساعتها اشتري المرسيدس
-
ما تفكرش في الغني
فكر في الحرية المالية
-
ما تفكرش تكسب اكتر
فكر انك تدخر اكتر
-
بحيث انك تبقي رايح الشغل لمجرد حبك للشغل
-
لكن تخيل واحد بيكسب في الشهر مليون جنيه
وبيصرف مليون جنيه
-
هيبقي رايح الشغل
بنفس شعور الموظف الدرجة العاشرة
في ارشيف مجمع التحرير
-
قايم من النوم مضروب علي بوزه ستين جزمة
لانه لو ما راحش الشغل النهارده مش هيقدر يدفع فواتيره
-
اي نعم فواتيره بتبقي اشتراكات في نوادي وسباهات
واقساط عربيات بي إمّ وسي إمّ وكاجوار
-
لكنها في النهاية فواتير
لو ما التزمش بيها هتحصل له مشاكل
-
عشان كده ما تعتبرش الغني بيكذب
لما يقول لك انه مش مستريح
-
هوا فعلا مش مستريح
مش لانه فقير - ولكن لانه ليس حر ماليا
-
ممكن حد يقول اني اقصد أقول
( عيش عيشة اهلك )
-
يا فندم لا
((( عيش أقلّ من عيشة أهلك )))
-
انتا لو عشت عيشة اهلك هتفضل طول عمرك فقير
هتجيب نيش زي اهلك
وهتجيب صالون مدهب زي اهلك
وهتجيب تليفزيون 359787 بوصة زي اهلك
-
وهتتدين زي اهلك
وهتشيل الهم زي اهلك
وهيبقي عندك 60 سنة وما حققتش حلمك
زي اهلك
-
اكسر الدايرة المغلقة دي
-
انا معايا موبايل سامسونج بيقول الو
من حوالي 5 سنين ما غيرتوش
-
وعربيتي عاوزة تتغير من 3 سنين ما غيرتهاش
مع العلم اني اقدر اغير الموبايل والعربية
-
لكن - مش ده الصح
ويوم ما هغير لازم يبقي معايا فلوس اكتر
من اللي هاصرفها علي التغيير
-
تقول الحكمة
لا أملّ بيتي ما وسعني
ولا أملّ ثوبي ما سترني
ولا أملّ دابتي ما حملتني
إنّ الملال من سئّ الأخلاق
-
يعني لو الحاجة تمام وشغّالة
بتجيب غيرها ليه ؟!
-
ليه بتطاوع شياطين التسويق والإعلان
اللي بيقنعوك إنّك لازم تجيب كلّ حاجة
عشان تبقي جامد دجاجة
-
الاقتصاد أكرم لك وأكثر حفظا لكرامتك
وكما قال أجدادنا
صبري علي بطني ولا صبر الجزّار عليّا
-
الفيصل بين الاقتصاد والإسراف هو
( الاحتياج )
يعني لو احتياجك في السنة هو 3 بناطيل
يبقي تجيب 3 فقط
لو جبت 4 تبقي مسرف
وعلي ذلك فقس
-
وقد قال رسول الله صلّي الله عليه وسلّم
ما عال من اقتصد
يعني اللي هيقتصد في مصاريفه مش هيفتقر
-
وتقول القاعدة
إذا اشتريت ما لا تحتاجه في وقت الرخاء
فستبيع ما تحتاجه في وقت الشدّة
-
اشترِ ما يلزمك فقط
وبحسب ابن آدم لقيمات يقمن صلبه
-
وكما تقول الحكمة
أوكلّما اشتهيت اشتريت ؟!
-
فالفقر فكر
مشكلة الفقير في عقله مش في جيبه
مشكلته هي عدم قدرته علي السيطرة علي نفقاته
ولهثه الدائم وراء شهوة الشراء
-
عشان كده
انا عمري ما فكرت ان الحل هو اننا نزود المرتبات
-
طب افرض زودناها
اقول لك
افرض ضاعفناها
هل الموظفين حالهم هيتحسن ؟!
-
اطلاقا
-
اللي كان بيتعشي فول وطعمية
هيتعشي جبنة رومي وزاتون اسود
واللي كان بيصيف في جمصة هيصيف في شرم
واللي كان بيلبس قميص وبنطلون هيلبس بدلة
واللي كان بيشرب سحلب هيشرب فراباتشينو
واللي كان بيركب مترو هيركب تاكسي
-
وبعدين
هيرجعوا يطلبوا زيادة المرتبات
عشان المرتب ما بيكفيش
-
وصدقني عمره ما هيكفي
الفكرة مش في ان مرتبك قليل
الفكرة ان مصاريفك كتير
-
فيه قاعدة اسمها قاعدة باركنسون
بتقول إنّ الشئ يتمدّد ليشمل الحيّز المتاح له
فمصاريفك هتتمدّد لتشمل الحيّز اللي إنتا سامح بيه
-
فلو مرتّبك 1000 وبقي 2000
وإنتا سامح لمصاريفك تزيد
هتلاقي نفسك
زيّ ما كنت بتخلّص ال 1000 جنيه في أسبوع
وتفضل تتوحوح باقي الشهر
-
هتلاقي نفسك
بتصرف ال 2000 جنيه في نفس الأسبوع
وتفضل تتوحوح باقي الشهر بردو
فالحلّ عمره ما كان في زيادة المرتّبات
-
سؤال اخير عشان انا طولت عليكم
هل انتا تقصد ان العيب في الشعب وهما اللي مبذرين
و و و
-
تقصد كلام لميس الحديدي يعني
لا خالص
-
انا بردو زي ما اعرف مبدا مصيدة الانفاق
اعرف مبدا الرفاهية الاقتصادية
-
لكن
بوجه كلامي ليك انتا لان انتا اللي قدامي
دي مشكلتك انتا وانا بحاول اقول لك انتا تحلها ازاي
-
لكن انا بردو شايف ان الطرف الاخر
عليه واجبات لا يقوم بيها
فخليني اتكلم معاك انتا
لانك انتا اللي انا اقدر اتكلم معاه
-
وشكرا
والسلام عليكم ورحمة الله وبركاته
-
#مرزوقيّات_في_البيزنس
#مرزوقيّات_في_الاقتصاد
#مرزوقيّات_في_المجتمع